कविता : चिन्ता

छन्द - भुजङ्गप्रयात

कतै छैन खाने कुराको र चिन्ता

कतै हुन्छ धेरै र छान्ने छ चिन्ता

कसैमा छ सम्पत् र कोही विपद्मा

मिलेमा त हामी नि हट्ला कि चिन्ता ।।१।।

कसैले त फुर्सद् नपाएर चिन्ता

छ कोही त कामै नपाएर चिन्ता ।

छ बेफुर्सदी जो र कामै विनाका 

मिलौँ आज हामी, र हट्ने छ चिन्ता ।।२।।

तिमी चिन्तितै छौ नपाएर पैसा

र ऊ चिन्तितै भो हराएर पैसा ।

न हट्ने छ 'पैसा हटाएर' चिन्ता

मिले पो नहोला सबैमाझ चिन्ता ।।३।।

नपाएर ओत्ने छ चिन्ता -कसैको-

छ आवास, बस्दैन मान्छे र चिन्ता ।।

मिलेदेखि चिन्ता कहाँबाट आओस्

न चिन्ता तिमीमा उनीमा न चिन्ता ।।४।।

भनौँ राम रामै गरौँ काम राम्रो

सबै हुन् नि हाम्रा सबै नै त हाम्रो ।

गरे उच्च छाती नहोला कि चिन्ता

भए प्रेम साथी नहोला कि चिन्ता ।।५।।

२०७६।११।२६गते सोमबार