२०८२-१०-७
कविता
देवदेश नेपाल
वैकुण्ठाधिपति त्रिलोकपति नै ब्रह्माण्डका नायक
गीता भारत वेदशास्त्र सबका ज्ञाता तथा गायक ।
शालिग्राम बनेर आउनुभयो श्रीगण्डकीकाखमा
पाऊँ जन्म म बारबार भगवन् ! यै देश नेपालमा।।१।।
कैलाशाधिपति स्वयं पशुपति श्रीपार्वती साथमा
गर्छन् नित्य विहार शैलबिचमा श्रीधाम नेपालमा
ब्रह्मा इन्द्र मरुद्गणादि सुर जो रम्छन् यही स्थानमा
पाऊँ जन्म म बारबार भगवन् ! यै देश नेपालमा।।२।।
जन्मे बुद्ध जहाँ तथा जनकले बाले दियो ज्ञानको
हिंसा दूर गरे, गरे सुरु यहीँ अध्यात्मको ध्यानको ।
प्रादुर्भाव भयो यसै भुवनमा श्री जानकी रूपमा
पाऊँ जन्म म बारबार भगवन् ! यै देश नेपालमा।।३।।
कर्णाली अनि कौशिकी कलकलै भेरी र राप्ती पनि
बग्छन् नित्य जहाँ पवित्र सरिता नारायणी गण्डकी ।
पार्छन् शोभित नित्य पुष्करहरू फेवा र रारा यहाँ
पाऊँ जन्म म बारबार भगवन् ! यै देश नेपालमा।।४।।
भाषा संस्कृति छन् अनेक थरिका संस्कार भिन्नै तर
छन् एकै जनता सुराष्ट्र बलियो निर्माणका खातिर।
छन् सर्वोच्च विशाल शैल हिमका सौन्दर्य खानी यहाँ
पाऊँ जन्म म बारबार भगवन् ! यै देश नेपालमा।।५।।
चेतनारायण लामिछाने
महर्षि वेदव्यास संस्कृत माध्यमिक विद्यालय (गुरुकुलम्)
व्यास ३ दमौली तनहुँ
No comments:
Post a Comment